O exercicio axuda ao cerebro a facerse máis resistente ao estrés

By Di Som | 28 abril, 2014 | Category Noticias

Científicos da Universidade de Princeton, en Estados Unidos, aseguran que a actividade física leva consigo efectos beneficiosos para o cerebro e se reestrutura para reducir a súa resposta ao estrés. Así, o cerebro logra que a ansiedade non afecte á súa actividade normal, segundo os resultados dun estudo que publica a revista Journal of Neuroscience.

O impacto da actividade física sobre o hipocampo ventral non se explorara a fondo ata agora, segundo recoñeceron os autores do estudo, que están convencidos de que hai rexións que poden axudar a comprender mellor e mesmo tratar os trastornos de ansiedade en humanos.

Ademais, dende un punto de vista evolutivo a investigación tamén mostra como o cerebro pode ser extremadamente adaptable os hábitos de vida. “Saber como o cerebro regula o comportamento da ansiedade dános pistas sobre posibles axudas ás persoas con estes trastornos, e explícanos como o cerebro cambia para responder de xeito óptimo ao seu propio ámbito”, asegurou Elizabeth Gould, unha das autoras do estudo.

Para os experimentos, utilizaron un grupo de ratos que estiveron a correr nunha roda e comparouse a súa actividade coa doutros roedores que non tiñan esta posibilidade. Despois de seis semanas, nas que os ratos con roda percorreron ata 4 quilómetros, os cerebros dos ratos activos e sedentarios comportáronse de xeito diferente cando se someteron ao estrés. Non obstante, as neuronas dos ratos sedentarios provocaron un aumento de “xenes de curta duración” que deron lugar a neuronas, mentres que nos ratos deportistas non sufriron tal activación, facéndose máis resistentes ao estrés.